يلا نتحد عشان مصر.. مرتضى منصور يعلن تنازله عن جميع القضايا ضد محمود الخطيب

أعلن المستشار مرتضى منصور، رئيس نادي الزمالك الحالي، والمرشح على نفس المنصب، في انتخابات الزمالك المقبلة، تنازله عن جميع القضايا ضد محمود الخطيب، رئيس النادي الأهلي، ومجلسه.

وقال "منصور"، في المؤتمر الصحفي الخاص بإعلان قائمته الانتخابية: تنازلت عن جميع القضايا المرفوعة ضد محمود الخطيب وبمد إيدي ليه بالسلام، أنت كابتن مصر واللاعب التاريخي وأنا بعترف بده.

وأضاف رئيس نادي الزمالك: يا كابتن محمود كل القضايا بتاعتك وبتاعت مجلسك في المحاكم أنا متنازل عنها، لو عاوز أنا بمدلك إيدي يلا نتحد عشان الريس اللي عمال يلف في كل مصر.

وأكمل مرتضى منصور: إحنا بنتخانق على حاجة عبيطة وادينا شايفين ليبيا والسودان عاوزين نقف جنب بلدنا وجنب الريس، ونتحد من جديد.

وفي سياق متصل، تم إغلاق باب الترشح في انتخابات نادي الزمالك، الذي بدأ يوم الأربعاء الماضي 22 ديسمبر، واستمر 7 أيام متتالية على مدار 8 ساعات يوميًا لتلقي طلبات الترشح.

وشهدت الأيام الماضية ترشح العديد من الأسماء وعلى رأسها المستشار مرتضى منصور، رئيس النادي الحالي، وأحمد سليمان، المرشح السابق على نفس المنصب في الانتخابات الماضية.

وترشح على منصب النائب اثنان من الأسماء الكبرى، حيث ترشح بقائمة مرتضى منصور اللواء مصطفى هدهد نائب محافظ البحيرة السابق، بينما ترشح المهندس هشام نصر، رئيس اتحاد اليد السابق، على نفس المنصب في قائمة أحمد سليمان.