محمد الغيطي يكتب.. ”وشوش“

وشوش كتير حوالينا جوه السوق

تحاصرنا بكلاحه تفوق السوء

اسوأ ما فيها جلدها الميت

ولما تضحك تشوفها وحل جوه شقوق

وشوش تقابلك بقلب أسود وعاملة ملاك

ولما تاخدك لسكة تبقى شين وهلاك

ولو سألت تحاورك تقنعك بالشر

تقولش ابليس لابسها وقاعدة تستناك

وشوش وربت كروش ومدعية الفقر

وهيه واكلة السحت في بطنها من الفجر

ولما ييجي الضحى تمص دم البشر

تكدب وتفجر وتجري تخطف صلاة الضهر

وشوش عليها البويا وش واتنين تلاتة

وجلد تماسيح فوقيها تلامة وتباته

وتحت الحقيقة تسيح وتتلوى

تلبس رداء المسيح ويهوذا وشحاته

وشوش لـ حوا جميلة مركبة ماسكات

تقلع وتلبس وتتعرى كمان بكاشات

وش لزوم الأدب مصطنع وكهين

والتانية وش الشرف وتحته سكر كاسات

انا م الوشوش احترت وعيوني تاهت مني

وف ضلي أنا اتكعبلت وروحي غابت عني

صبحت أضبش ياعمي وأصدق البويا

وأخد الخازوق وباسمي بايد بشر كانوا مني

كل المرايا أزاز مشروخ وصورتي أزيز

واللي حاسبهم عزاز حبسوني في البراويز

اتعرى من جلدي واشرب عصير عندي

وكبريائي المريض لساه عاملني عزيز

أه يابشر من حجر وعيون بلاستيك وصخر

أنا قلبي ورقة شجر مروية حب وقهر

لا أنا هاقدر اتغير ولا أشيل غلكم

خلوني جوه الكهف وزادي هوه الصبر