علاقة جنسية غير شرعية في فراش الزوجية.. نص اعترافات قاتلة زوجها بالسم بالمنوفية

كشفت المتهمة بقتل زوجها عن طريق وضع السُم بكوب العصير المفضل له "جوافة بالفراولة"، بمساعدة عشيقها بقرية كفر الفرعونية التابعة لمركز أشمون بمحافظة المنوفية، عن تفاصيل ارتكابها للواقعة، وحصل "أنا حوا" على كامل الاعترافات التي أدلت بها المتهمة أمام النيابة العامة، كاشفة عن كيفية ارتكابها للجريمة.

وجاءت اعترافات الزوجة كالآتي؛
اللي حصل أن انا كنت متجوزة مرزوق احمد عبدالمعبود الله يرحمه من حوالي اربعة عشر عامًا تقريبًا وكانت العلاقة بينا كويسة ومكنش في اي حاجة وكان "أ.ح.ع" بيجي عندنا البيت عند حمايا بحكم ان هو من البلد من عندنا وفي نسب وقرابة بين اخواته البنات وبين اولاد عم جوزي من حوالي اربع سنين تقريبا بدأت انا وهو نتعرف علي بعض ونكلم بعض في التليفون وصارت علاقة بيني وبينه.

وأضافت المتهمة بقتل زوجها "وبدانا نتكلم انا وهو مع بعض وكنت ساعات بخرج معاه بالعربية بتاعته لأن معاه عربية سزوكي وكان ساعات بيكون معايا اولادي وبعدين كان ساعات بيجيلي البيت وكنا بنقعد مع بعض وعيالي بيكونوا نايمين وجوزي بيكون في الشغل وكنت بعقد احكيله عن تفاصيل المعيشه بيني وبين جوزي مرزوق الله يرحمه وكنت بقوله ان مرزوق جوزي الله يرحمه كان بيبقي تعبان وعنده فيرس كبد وكان ساعات مبيقدرش يتحرك كتير او يعمل اي مجهود.

وتابعت: ساعتها العلاقة اتطورت بيني وبينه وبدا يجيلي البيت اكثر من مرة وحصلت بينا علاقة جنسية (معاشرة جنسية) اكتر من مرة على فترات مختلفة ومكنش حد يعرف خالص لا جوزي ولا حد من اهلي ولا اولادي لغاية لما جيت في يوم قولتله ان مرزوق بدأ يتعب بزيادة وهو قالي ان احنا لازم نريحه ولقيته بيقولي ان هو لما يتعب تاني والتعب يزيد عليه اديله برشامتين مهدئين من اللي الدكتور كاتبه ليه وساعتها لقيته اداني ازازة بيضاء في مادة سايلة وقالي ان دي هتخلص على مرزوق حطهاله على اي عصير يجي يشربه وانا اخدت منه الازازة وفعلا لما مرزوق التعب زاد عليه انا اديته برشامتين مهدأين زي ما قالي من العلاج اللي الدكتور كان كاتبه لمرزوق.

وقالت: مرزوق ساعتها الله يرحمه قالي انا عاوز اشرب عصير وهو كان بيجب يشرب عصير فراولة على جوافة وانا عملتله العصير وجبت الازازة اللي "أ.ح.ا" كان مديهالي وجبت سرنجة وسحبت منها حوالي واحد سم وحطيته على العصير وقلبته واديته لمرزوق ومرزوق شربه وبعد ما شربه بحوالي نصف ساعة لقيت مرزوق جوزي الله يرحمه جسمه بدأ يريح ويتقل ولقيته دخل اوضة النوم علشان يريح جسمه وبعدها بحوالي عشر دقايق لقيته قام ودخل الحمام وفضل يرجع حوالي دقيقتين وبعدين رجع الاوضه تاني وقالي شوفيلي اي حاجة علشان تغطيني علشان انا سقعان وانا ساعتها خرجت وكلمت "أ.ح.ا" وقلتله على اللي حصل وقلتله تعال علشان انا عملت اللي انت قولتلي عليه وخايفة قالي متخفيش وانا نص ساعة وجايلك وبعدها لقيته جاي واتصل عليا وقالي ان هو موجود قدام باب البيت بتاعنا ورحت فتحتله وقالي في ايه قلتله مرزوق سقعان وجسمه مثلج وانا عملت اللي انت قولتلي عليه ومش عارفة اعمل ايه وهو موجود جوه على السرير في اوضة النوم قالي متخافيش وانا هخلصك منه ولقيته اخد مخده كبيرة كانت موجودة في الصاله وقالي ادخلي قدامي.

وأكملت "م.ص.ح" قاتلة زوجها بمساعدة عشيقها بمحافظة المنوفية اعترافاتها قائلة: ودخلت قدامه غرفة النوم وساعتها مرزوق قالي اطفي النور علشان انا عاوز انام وانا طفيت النور العالي بتاع غرفة النوم وسبت النور الواطي وساعتها "أ.ح.ا" اتسحب من ورايا كان ماسك المخدة ودخل جنب السرير من الناحية اللي فيها مرزوق وساعتها انا جيت انام جنب مرزوق وحطيت ايدي على ايده الشمال وساعتها "أ.ح.ا" مسك المخدة وحطها علي وش مرزوق علشان يخنقه بايده وكان ماسك المخدة بايده الشمال حاطط ايده اليمين على ايد مرزوق وفضل حاطط المخدة عليه خمس دقايق لغاية لما مرزوق نفسه قطع خالص وبعدين هو شال المخدة من على وش مرزوق وضاغط جامد حوالين رأسه واحمد ساعتها قالي ان مرزوق مات وقطع النفس وانا ساعتها قلتله هنعمل ايه قالي متخفيش وقالي ان هو هيمشي دلوقتي علشان محدش يشوفه وقالي اتصرف طبيعي وبعدها هو مشي وانا فضلت قاعدة جنب مرزوق لغاية النهار لما طلع.

وأوضحت: وبعدين حوالي الساعة 10 ونص الصبح خرجت علشان انده لحمايا واقوله على اللي حصل وخرجت لقيت حمايا كان رايح الغيط وندهت عليه وقلتله تعال بسرعة شوف مرزوق فيه ايه وجه معايا ودخل الاوضه وشاف مرزوق وساعتها راح جاب دکتور علشان يكشف على مرزوق والدكتور جه وقال ان مرزوق مات من حوالي ثلاث او اربع ساعات وان سبب الوفاة سكته قلبية وبعدين عملنا تحضيرات الدفن والغسل الطبيعية وبعدين بعدها بحوالي أربعة أيام كلمت "أ.ح.ا" واتكلمت معاه عادي وقالي متخافيش محدش هيعرف أي حاجه من اللي حصلت خالص وبعدها انا اتصرفت عادي وبعد وفاة مرزوق جوزي بحوالي شهر ونصف انا لقيت بنتي بسمله بتتصل عليا وبتقولي ان عمها اسلام لقى على تليفونها رساله من الرقم بتاع "أ.ح.ا" كان مضمونها كلام عادي وساعتها اسلام كلمني وبيقولي ايه اللي بينك وبينه قلتله مفيش حاجة بيني وبينه وبعدها حصلت مشكلة بين اهلي واهل مرزوق جوزي ولقيتهم بيقولولي ان في علاقة بيني وبينه وانا قلتلهم الكلام ده مش صحيح وساعتها هما خدوا التليفون بتاعي وبتاع بسملة بنتي وبقى معاهم وبعدها لقيت المباحث جم خدوني وجابوني على المركز وجابوني النهاردة على النيابة هو ده كل اللي حصل.

وكانت سيدة قد أقدمت على التخلص من زوجها بقرية كفر الفرعونية التابعة لمركز أشمون بمحافظة المنوفية، بمعاونة عشيقها، وأدلت بذلك في اعترافاتها أمام النيابة العامة، لتقرر النيابة استخراج الجثة بعد دفنها بـ 43 يومًا.

وكان اللواء حازم سامي مدير أمن المنوفية، تلقى إخطارًا من العقيد محمد أبو العزم مأمور مركز شرطة أشمون، يفيد بتقدم عامل ببلاغ يتهم فيه زوجة شقيقه بقتله عن طريق دس السم له في العصير.

وبضبط المتهمة اعترفت بارتكابها الواقعة، وقررت النيابة العامة استخراج الجثة بعد مرور 43 يومًا على دفنها وتشريحها وإعداد تقرير مفصل عن أسباب الوفاة، قبل أن يصدر التقرير النهائي ليؤكد أن الوفاة بسبب السم.