”عنده مرض جنسي واتحرش بيا كتير”.. ننشر أقوال ممرضة طبيب روض الفرج

كشفت التحقيقات في واقعة اتهام طبيب أمراض نساء وتوليد، يدعى أيمن. م، بمساومة النساء على إجراء عمليات إجهاض لهن مقابل ممارسة الرذيلة معهن في عيادته الخاصة بمنطقة روض الفرج بالقاهرة تفاصيل جديدة.

وأوضحت أن المتهم يعاني من مرض جنسي وحاول إثبات قدرته الجنسية لنفسه، مشيرة إلى أنه تم العثور على فيديوهات للطبيب داخل أحد النوادي كان يصور فيها الصغار أصدقاء أبنائه داخل حمام السباحة.

وحصل "أنا حوا" على التحقيقات في الواقعة التي حملت رقم 2511 لسنة 2023، ووجهت جهات التحقيق إلى المتهم تهمة مساومة النساء على إجراء عمليات إجهاض لهن مقابل ممارسة الرذيلة معهن في عيادته الخاصة.

وكان المتهم يتحصل على أموال من بعض السيدات مقابل إجراء عمليات الإجهاض لهن، فيما كان يجبر أخريات على توقيع إيصالات أمانة حتى لا يتهربن من دفع الأموال مقابل إجراء عملية الإجهاض.

هتك عرض صغيرة داخل حمام سباحة.. والد ضحية لطبيب الإجهاض: استغل صداقة أولادنا وخان العيش والملح
لم يكتف بممارسة العلاقات غير الشرعية مقابل عمليات الإجهاض.. وقائع جديدة لطبيب روض الفرج مع بنات قصر| خاص
وجاءت أقول إحدى الضحايا والتي كانت تعمل بالعيادة ممرضة كالتالي:

اللي حصل إن أنا بعد لما خلصت تالتة ثانوي كنت جايبة مجموع 51 % ومكنش في إمكانيات أدخل كلية، وقعدت شهرين في البيت والتنسيق بتاعي جالي معهد في العبور وكانت مصاريفه عالية وأنا مقدمتش الورق أصلا، وبعد كده كنت بدور على شغل وكنت بسأل الناس على شغل لحد ما جارتي جابتلي الشغل وقالتلي إن في دكتور نساء اسمه أيمن مواعيده من 5 لـ 10 مساء، فمامتي رفضت علشان الوقت متأخر وبعد كده طنط جارتي راحت للدكتور وقالتله إن مامتها رفضت وطنط دي كانت شغالة عنده قبل كده والدكتور قالها خلاص خليها تيجي من 9 الصبح لـ 1 الضهر، فمامتي وافقت على كده وروحت اشتغلت عنده وأنا كان عندي مرض من 4 سنين اسمه ثعلبة كلية وكان في يوم بروح جلسة بلازما على شعري في الأسبوع، فعرفت دكتور أيمن علشان لو مجتش يوم ميزعلش، قالي لا متروحيش الجلسات دي تاني وهكلم صحابي في إنجلترا أمراض جلدية وأنا اللي هجبلك العلاج وهعالجك أنا.

وتابعت الممرضة: اتخطبت لشخص كنت بحبه اسمه عبدالمنعم فالدكتور أيمن بدأ يقولي إن خطيبي بيضحك عليا وأنا مكنتش أعرف هو بيقولي كده بناء على إيه، وابتدا يدخل في حياتي وكان بيقولي اطلبي من خطيبك حاجات كتير وأنا مكنتش بطلب منه حاجة، وكنت بقوله متدخلش في حياتي وبعدها قلتلهم كذا مرة أنا عاوزة أسيب الشغل وبعد كده في يوم خطيبي خدني وكنا خارجين مع بعض وهو خدني لمكان عند واحد صاحبه في البيت وعمل معايا علاقه كاملة، بعدها بفتره دكتور أيمن كان بيعملي تحاليل كل شهر عشان المرض اللي عندي ويبعتها لصحابه في إنتجلترا، واكتشف وقتها إني حامل والكلام ده كان يوم 20 / 3 / 2023، ولما رحت تاني يوم قالي إني حامل وبعد كده هو قالي إنتي هتعملي إيه والكلام ده كله، وخد مني التليفون بتاعي وحطه بعيد.

وتابعت الممرضة: قالي أنا عندي حل ليكي إن أنا أنزلك البيبي ومش هقول لأهلك وهعملك عملية وتكملي شغل معايا، فأنا وافقت بس معملتش عمليات خالص وقالي إن أنا أضمن منين إني بعد لما أعملك العملية متمشيش من الشغل وقالي كلامك مش ضمان همضيكي وصل أمانة، فأنا رفضت وبعد كدة قالي لو ممضتيش على وصل الأمانة هفضحك، وهقول لأهلك إنك حامل وفضل يهدد إن أنا لو ممضيتش الوصل هيقول لأهلي، فمضيت الوصل تحت التهديد إنه يقول لأهلي إني حامل.

وأردفت الممرضة: قالي إنتي لو مكنتيش مضيتي كنت كلمت جارتك تيجي وهحكي كل حاجة ليها، وهي تقول لأهلك إنك حامل وهو في الوقت ده كان واحد تليفوني وأنا مكنتش بكلم خطيبي، وبعد كدة لما قلت لخطيبي إن أنا حامل قالي أنا مش هسيبك وهتجوزك وكتبنا عند محامي، وطول الأسبوع الدكتور أيمن كان بيمسكني من أماكن حساسة في جسمي وأنا مكنتش بقدر أتكلم، وطلب مني علاقة كاملة وإلا هيقول لأهلي فأنا رفضت، وبعد كدة قلت لجارتنا إنه بيتعرضلي جسديا، فقالي إنتي كدة بتضطريني إن أنا أحكيلها وهحكي لأهلك وحكالها بالفعل، فقالتله أنا مش هتحمل مسؤلية حاجة زي كدة وقول لأهلها، وبعد كدة بيومين اتصل بمامتي وحكلها كل حاجة، وبعدها بيوم قابل بابا وحكاله كل حاجة، وبعد كدة فضل فترة بعيد، وراح عمل محضر فيا إن هو بيخلي مسؤليته عني وعن الحمل اللي في بطني، وحد من القسم جالنا البيت وجينا معاه وأخدنا تعهدات على بعض إن محدش يتعرض للتاني، وقلت إن العلاقة اللي حصلت بيني وبين خطيبي كانت برضايا وبعد كدة مشينا.

وأكملت: بعدها بفترة بعتلنا مع جارتي إن هو ياخدني يعملي حساب خاص علشان الدواء اللي بيتبعتلي من برا يتبعت عليا على طول وميبقاش هو وسيط فيه، وإني أرجع الشغل ولو مرجعتش هيكلم عمي وخوالي ويفضحني في وسط العيلة كلها، وإنه معاه أرقامهم ويعرفهم كلهم، بعد كدة يوم الخميس اللي جالنا أمين شرطة بيسأل على خالي وقاله إن بنت أختك معاها مشكلة في القسم مع دكتور أيمن عاوزينك علشان تحلها، فخالي قاله أنا في الشغل دلوقتي ومش عارف أجيلك، وقاله في مشكلة في القسم مع الدكتور أيمن قاله خلاص روح وأنا هبعت باباها وأبعتها ولما رحنا القسم أنا قلت لبابا موضوع التحرش اللي كان بيعملوا معايا دكتور أيمن، ولما رحت القسم حكيت على اللي حصلي ولما جيت أعمل محضر، اكتشفت إني معمولي محضر وصل أمانة، ومعملتش محضر ومشيت وبعدها بيوم عملت المحضر وجيت النهاردة على التحقيق وده كل اللي حصل.