شقيقة وجدي العربي تتبرأ منه بعد شماتته في وفاة نجل حسن يوسف وشمس البارودي

تبرأت ألفت العربي، ابنة الفنان الراحل عبد البديع العربي، من شقيقها وجدي العربي بعد شماتته في وفاة نجل الفنان حسن يوسف والفنانة المعتزلة شمس البارودي.

وقالت ألف العربي خلال تصريحات تليفزيونية: "كلمة أخويا كبيرة أوي ووجدي العربي ميستحقهاش، واتقدم بخالص العزاء لأخويا الكبير الفنان القدير حسن يوسف وزوجته الفاضلة الحاجة شمس البارودي، وانا اتولدت لقيت حسن بيقول لوالدي يا بابا وكنا عائلة واحدة لما كنا عايشين في بيتنا بالسيدة زينب".

وأضافت: "حسن يوسف لما ربنا كرمه وابتدأ نجمه يلمع وانتقل الي مصر الجديدة حسيت في اللحظة دي اننا عائلتين مش عائلة واحدة، ووالدته ووالدتي الله يرحمهم كانوا يبكوا بكاءًا حارا علي فراقهم وانتقالهم بعيدا عن منزلنا، وكان فيه وقتها اغنية خسارة خسارة فراقك يا جارة، يشغلوها ويبكوا لإننا كنا جيران في نفس البيت".

وتابعت: "بابا لما كنا في السيدة زينب، كان بيجيلوا البيت كبار الفنانين، وكان وقتها حسن يوسف بيتسلل ويحاول يسمعهم يقلد البروفات اللي بيعملوها، وقتها بابا حس بموهبته وابتدا يهتم به ولكن عم يوسف مسك ابويا وقال له اسمع يا بديع انت هتبوظ الواد بالتمثيل اللى انت بتعمله ده فبابا قال اسمع يا حسن لو منجحتش بتفوق في المدرسة مش هخليك تحضر البروفات".

وأشارت: "عبدالله حسن يوسف اللى توفى وكإنه ابني اللى توفى وانا لو في صحتي قادرة اني أروح واطيب بخاطرهم وأواسيهم وابقى جنبهم كنت روحت، بس ربنا اقوى من الكل ويطبطب عليهم ووعدهم بالجنة وابنهم ده شهيد، أما حتة الشماتة من وجدي العربي هنقول ايه من واحد باع وطنه واهله وناسه وراح قعد في بلد مش بلده، كل حاجة في الدنيا مثل الأم البديلة أو الأب البديل انما عند الوطن مفيش يا اما مواطن صاحب ارض او لاجئ في بلاد الغربة".

وتابعت: "مصر بالنسبة لي ترابها الواحد يتكحل به واحنا قيمتنا ايه في الدنيا من غير وطننا، للاسف ربنا ابتلانا بوجدي العربي وربنا يعيني عليه لإنه هو مسود وشي مع كل الناس وانا لا اتابع برامجه واعتبرته مش في حياتي ولا اخويا وانا متبرأة منه من سنين طويلة، ياما يا وجدي العربي عملت في شبابك اللى ميتعملش من شقاوة الشباب وكنت اتمنى يكون عنده شوية دم ويبعت برقية عزاء وكلمتين مواساة لإخويا الكبير حسن يوسف، اصحى بقى وعيش الواقع وفوق لنفسك وسيبونا في حالنا".