محمود حسن يكتب: غلال الرحاية

يا ترى الناس سواسية فعلا ؟ وهل اي مواطن زي اي مواطن ؟
وهل المواطن الشريف هو اللي لابس ملابس غالية وشكله نضيف ؟
ولا في ناس فوق علطول وناس تحت علطول
وليه دايما نسمع جملة " إنت مش عارف أنا مين ؟
او جملة أنت أيش تكون ؟
ليه دايما في ناس أمورها سالكة وصفقاتها بتم دايما بسلاسة ويسر ، والفيلا سرعان ما تتكاثر وتبقى دستة ، والسيارة تولد وتبقى خمسة ، والفدان يتمط ويبقى خمسمية ، والحساب بقدرة قادر يكتظ ، والخزنة في منت تتكدس ، والكرش في كام شهر يترهل وكأنه حامل في التاسع ؟
وليه دايما في ناس تانيين غير الناس دول هما المصابين والمبليين بوقف الحال ومفيش مصلحة بتمشي معاهم مهما بذلوا مجهود ، او تعبوا من غير حدود والسعي بالنسبالهم زيادة معاناة وتراكم ديون وزيادة للطين بله ،
وليه الناس دي هما المادة الخام للمحاكم والمحابس ، وهما اللي مفتوحة عشانهم أقسام الشرطة وأكل عيش الحكومة على حسابهم ، وعلى قفاهم بتم ممارس تمارين الصباح والمساء ،
ليه معظم الناس دي بيضيعوا ويتدمروا هما وأولادهم من غير سبب او بسبب سعيهم للرزق وبحثهم عن فرصة للحياة ، وعمرهم بيخلص وهما بيجروا ورا تحقيق حلم واحد بسيط قيمته لا تتعدى تكلفة حفلة صغيرة للناس الأولنيين واللي بيعملوها كل كام يوم بمناسبة تافهة جدا او من غير مناسبة اصلا ،
ليه دول حالهم ماشي ودول حالهم واقف ؟
ليه دول طريقهم أخضر وسريع ، ودول طريقهم كله مطبات ومسدود ؟
ليه دول عددهم قليل جدا وثرائهم فاحش ؟
ودول كتير جدا وفقرهم دكر ،
ومن هو صانع تلك المفرمة في كل زمان ومكان ؟

ليه دايما في ناس شبه الغلة اللي بتحط في الرحاية ، وراسهم تتكسر بين حجرين ، وتطحن ، وتنزل دشيشة ، وتتعجن ، وتدخل الفرن تستوي في النار على الجنبين ، وتتاكل ، وتتهضم ، وتنزل في مواسير المجاري فضلات ،
وتسأل الناس إياهم عليهم يقولك اصل الناس طبقات ،
ويقولك ورفعنا بعضكم فوق بعض درجات ،
وهو غبي جدا بيقول الآية الكريمة غلط ولا يعرف معناها ولا تفسيرها ولا بداية الآية ولا كمالتها ،
يقول تعالى " أَهُمْ يَقْسِمُونَ رَحْمَتَ رَبِّكَ ۚ نَحْنُ قَسَمْنَا بَيْنَهُم مَّعِيشَتَهُمْ فِي الْحَيَاةِ الدُّنْيَا ۚ وَرَفَعْنَا بَعْضَهُمْ فَوْقَ بَعْضٍ دَرَجَاتٍ لِّيَتَّخِذَ بَعْضُهُم بَعْضًا سُخْرِيًّا ۗ وَرَحْمَتُ رَبِّكَ خَيْرٌ مِّمَّا يَجْمَعُونَ " صدق الله العظيم ،
فإلى متى هتفضل الرحاية دايرة واسنانها مش بترحم ، وعنينا مركزة على شكل الغلة وهي بتتهرس وتتكسر على الف حته ، لكن مفيش حد بيبص على اللي ماسك عصاية الرحاية وبيدورها ،
ولا حد سأله أنت ليه مدورها ؟
ولا حد اصلا شايف ولا عارف مين هو صاحب العصاية المنكوتة في ضهر الرحاية ؟؟