خبراء يأكدون ان أسماك القرش تنجذب نحو النساء النازلات البحر بمكياج وزينة

تداول رواد مواقع التواصل الاجتماعي، منشورًا لأحد المغردين يقول، بمناسبة السباحة و الصيف، يمكن تحب تفتكر الملاحظات دي، و أنت بتقضي وقتك على أي شاطيء في أي مكان في العالم...

وأضاف المنشور، مفيش حاجة اسمها "البحر دا مفيهوش قروش".. مفيش بحر على سطح الأرض مفيهوش قروش.. حتى القطب.. فيه قروش.. القروش بتعيش في المياه الباردة.. و الدافئة.. و في كل بحار الدنيا... حتى الانهار، ممكن تقابل فيها قروش.

السيدات اللي بتنزل البحر بالميكياج.. و كريمات الجسم.. و الشباب اللي بتحط مزيل عرق قبل السباحة، و كريمات الشمس.. الروائح دي بتجذب القروش و تثير فضولها.. أعتبر البحر زي حمام السباحة.. خد دوش قبل نزول البحر..

وأكمل، لو بتتحرق و تلتهب من الشمس تبقي في الحقيقة عندك حساسية معينة.. استشر الطبيب يكتبلك مضاد حساسية مناسب قبلما تنزل الميه.. حايحميك و مش حاتجيلك حروق.. بدل الكريمات نفاذة الرائحة...

على ذكر حمامات السباحة و محظوراتها.. البول في البحر زي الدم بالضبط.. ريحته بتشمها القروش على بعد أميال..

وأكد بلاش تعوم في مكان انت مش شايف المياه و أعماقها فيه كويس.. و بلاش تعوم في مكان غير مطروق مفيهوش سباحين..

القروش ممكن تطلع لك للمياه الضحلة.. زي الصورة كده.. فباستمرار لازم تكون شايف القاع حواليك.. و ماتكونش المياه داكنة جدا أو فيها عكارة رمل...

مش ضروري تعوم داخل المياه لمسافة طويلة .. دي مش شطارة.. و مش محتاج تثبت حاجة لحد.. خد معاك نضارة سباحة عشان تعرف تبص تحت المياه وقت الضرورة.

لما تقلع النضارة اقلعها حوالين رقبتك مش فوق راسك. فوق راسك دي اشارة للمنقذ بتقول انك في خطر.

ماترميش اي بواقي أكل في المياه.. حتى لو ساندوتش جبنة.. حتى لو بسكوت.. و لو شفت حد بيعمل دا.. إمنعه...

وأضاف، الحاجات دي مهما بلغت تفاهتها بتستدعي اسماك معينة عشان تاكلها.. و القروش بتاكل الاسماك دي.. و بتدور عليها...

لو اتجرحت لأي سبب أخرج من المياه فورا.. مهما كان جرح صغير.. و للسيدات، أي نزيف "ايا كان مصدره" يمنعك من السباحة..

ممنوع لبس الخواتم و الدبل و الساعات و الأساور البراقة الفضية..

إذا شعرت و أنت بتعوم إن في موجة مفاجئة دفعتك من اسفل إلي أعلى.. اخرج من المياه فورا..

مفيش داعي للطرطشة و احداث ارتباك علي سطح المياه و انت في عمق.. و ممنوع في جميع الأحوال تغوص لوحدك..

ممنوع تتعرض لأي شكل من اشكال الحياة البحرية.. و لا تحاول تلمسها أو تستفزها.. و لو لقيت كائن بحري ميت بجوارك اخرج من المياه...

لما تلاقي لافتة ممنوع السباحة.. أو العلم مرفوع.. ماتنزلش المياه.. مش شطارة برضه.. و لو بتعوم وحارس الشط أو رجل الإنقاذ صفر لك.. اخرج فورا...

ماتحاولش تعوم بالقرب من مراكب الصيد أو الصيادين...

بلاش الهزار المرح بتاع "انا باغرق/ الحقوني قرش".. عشان وقت الجد ماحدش حايساعدك...

ماتنزلش للسباحة أو الغوص على الإطلاق في مكان ماتعرفوش...

لو أمسك بيك قرش فعلا.. حاول تمسك عينه أو خياشيمه.. ساعتها يتركك فورا.. اعرف شوية عن طبيعة المكان اللي رايح تصيف فيه.. و ابحث عن أنواع القروش الموجودة و الحياة البحرية الخطرة...

ماتدخلش بطفل صغير لمكان عميق.. لو مصمم ادخل و خاطر بحياتك لوحدك...

ابعد عن السباحة في مداخل القنوات و المياه المفتوحة زي ما تكون مثلا في رحلة يخت و تنزل تسبح حوالين اليخت.. ابعد عن الحيد المرجاني...

أي حد يقولك "القروش مبتحبش لحم البشر" اشكره على المعلومة وابتعد عنه وتجاهله تماما..

القروش بتاكل اي لحم. حتى لحمها هي نفسها.

في حيوانات أخرى غير القروش تبدو مسالمة زي الدلافين و السلاحف.. "الغلاسة" عليها ممكن تخليها تقتلك بسهولة تامة.. السلحفاة البحرية ممكن تبترلك اصبع أو اتنين.. أعتقد إنك يمكن مش حاتبقى سعيد بدا أوي...

احترم البيئة البحرية و حاول ما تمدش ايدك على أي كائن...