نبيلة مكرم تلمح إلى أزمة ابنها: ماتقلقش لو اتقالك مافيش أمل

روت السفيرة نبيلة مكرم، وزيرة الهجرة وشؤون المصريين بالخارج السابقة، قصة مؤثرة عن دودو قز تعرضت لضيقة لكنها تمكنت أن تتغلب عليها وتخرج منها قوية في إشارة إلى أزمة نجلها رامي المقيم في أمريكا والمتورط جريمة قتل.

وقالت نبيلة مكرم عبر صفحتها الرسمية على موقع التواصل الاجتماعي "فيس بوك: "كانت فاكرة إنها حتفضل طول عمرها دودة قز بتزحف على بطنها، كبيرها تبص لفوق، وتقعد تندب حظها.

وأضافت في سرد القصة: "نصيبها تدخل بعد كده فى الشرنقة، والدنيا تبقى ضلمه عليها وضيقة...طب مافيش حد يساعدها ويقص الشرنقة علشان تطلع منها، وتتخلص من غلبها؟.

وتابعت:" طلع إن كله محسوب علشان ماتطلعش ضعيفة وتقع تانى على بطنها، وبتوقيت اللى خلقها، تخرج قوية باجنحتها الملونة".

واختتمت وزيرة الهجرة وشؤون المصريين بالخارج السابقة قصتها بحكمة قائلة:" ماتقلقش لو اتقالك ده مافيش أمل، ربك مخطط بحكمته مستقبلك".

وكانت السفيرة نبيلة مكرم وزيرة الهجرة السابقة، تحدثت لأول مرة عن اتهام نجلها في قضية قتل بالولايات المتحدة الأمريكية.

وقالت نبيلة مكرم خلال تصريحات تليفزيونية: "رامي ابني ولد شاطر وهادئ وعمره ما سبب أي مشكلة، ولكنه زيه زي أي حد عايز يخرج ويسافر ويكمل دراسته في الخارج، وسافر أمريكا وهو عنده 18 سنة، وكان بيدرس تحليل البيانات في جامعة بكاليفورنيا وهو من النوابغ في المجال ده، وبعد لما خلص الجامعة بتاعته عمل ماجستير في جامعة كولومبيا بنيويورك".

وتابعت: "رامي ابني أنا بقول عليه ولد محارب وكان يحمل مرضه داخله من غير ما يعرف حد، وهو ولد مثالي ظروف المرض هي اللي أدت للمشكلة اللى وقع فيها".

ولفتت: "أنا مثل أي أم محبش حد يقول حاجة على ابني، وأنا كنت عارفة حقيقة مرضه وتوقعت أول لما عرفت الجريمة إن ليها علاقة بمرضه، بس معجبنيش إن حد يتكلم معاه إنه مجرم، وفيه توصيفات اتقالت محبش أدخل فيها، ومينفعش حد يتكلم إلا لما يعرف حقيقة الموضوع".

وأكملت: "في التجارب والابتلاءات وفي الضيقات بنبص على الناس أكتر، وبنكتشف ناس قريبين مني وعمرك ما كنت تتخيل إنهم يتركوك في اللحظة الصعبة بيتركوك، وناس تانية عمري ما كنت أتخيل إن ممكن يبقى فيه علاقة لقيتهم جدعان ورجالة معايا، والحقيقة شُفت الناس على حقيقتها واتعلمت من التجربة حاجات كتيرة".

ولفتت: "أنا فخورة بأولادي وبوقفتهم وإيمانهم وثباتهم، ومش بعدي المحنة لوحدي ولكن بعديها معاهم علشان احنا الأربعة ماسكين إيدين بعض علشان نعدي المحنة دي، وبالتأكيد ولادي الاتنين إخوات رامي موضوع جريمة القتل المتهم فيه أخوهم الكبير هزهم وعانوا، وأنا كأم كنت بلم الموضوع وبشرح لهم إن اخوهم مش مجرم ولكنه مريض، وهما تفاعلوا بالمصارحة والمواجهة".

وأشارت نبيلة مكرم: “كل 3 شهور باروح لرامي علشان أشوفه وأطمن عليه، ولما برجع الولاد لازم يقعدوا معايا واحكي واتكلم إحنا وصلنا لفين، ويتطمنوا علي أخوهم، وده كان سبب اني اعمل مؤسسة "فاهم” من ناحية الأسرة وإنها لازم تفهم علشان تسند".

وأوضحت: "أزور نجلي رامي بملابس منزلية بهدف إيصال رسالة تضامن معه وهي أن الحياة متوقفة بسببه"، لافتة: "رامي ابني كان مريض نفسي وبياخد أدوية ومرة واحدة وقفها وبعدين عرفت ان فيه اصوات بتيجي لإبني رامي وأمرته انه يقتل وده كان سبب وقوعه في جريمة القتل بالولايات المتحدة الأمريكية".

ووجهت نبيلة مكرم، رسالة مؤثرة لابنها رامي، قائلة: "عايزة أقوله اني بحبه ووراه أم جدعة، واحنا هنكمل والقضاء هياخد مجراه والمصريين كلهم بيدعوا له، وقلت له: مسلمين ومسيحيين بيدعوا له، والصلوات والدعوات أكيد ربنا هيستجيب لها".