هاني رمزي يكشف موقفًا مؤثرًا للزعيم عادل إمام

قال الفنان هاني رمزي: "عندي فوبيا من الزمن، أحلامي كتيرة جدًّا وأنا ما أعرفشي عمري قد إيه، وعلشان كدا أنا في سباق مع الزمن"، موضحًا "أنا خايب أوي في موضوع عمل حساب للزمن، وأنا مسرف جدًّا ودايمًا اللي في إيدي مش ليَّ وفي نفس الوقت فيه مسؤوليات كتير".

وأضاف "رمزي" خلال تصريحات تليفزيونية: "عمر ما ربنا سابني في لحظة، وأنا حملي كله على ربنا وراضي بأي حاجة، واللي أنا فيه كتير عليَّ".

وعن علاقته بالزعيم عادل إمام، قال: "هو نجم النجوم وفنان فريد من نوعه ورمز من رموز الفن العربي ونفخر به وهو زعيم في كل حاجة حتى في تفكيره وبسيط بساطة غير طبيعية رغم النجومية والشهرة والمجد اللي شافه".

وتابع: "ما أنساش ومسلسل اللص الذي أحبه، بيتعرض، ولقيت الفنان عادل إمام بيكملني في التليفون وأنا مش مصدق إنه عادل إمام، وبيقول لي أنا جِبت تليفونك ومبسوط أوي من دورك وهيبقى ليك مستقبل جامد جدًّا، وأنا من سعادتي ما كنتش عارف أرد عليه، وقال لي أنا حبيتك في الدور".

وأوضح: "عادل إمام لو اتفرج على فيلم معين ألاقيه اتصل وبارك وكإنه بيبارك لابنه، ولما اشتغلنا في فيلم غبي منه فيه، كان ابنه رامي المخرج، فكانت مشاعر عادل إمام مع ابنه مشاعر الأبوة، ويتصل بيَّ ويقول لي هو عامل إيه وأخرج المشهد إزاي فأقول له ما تخافش عليه دا اتربى في بيت زعيم الكوميديا، وكان يجي يزورنا في اللوكيشن وعايز يساعدنا ويحط لنا إفيهات، وقربنا منه بشكل أسري وبقينا أصدقاء وبقى صديق والدي وإخواتي، وهو بالنسبة لنا حاجة كبيرة".

ولفت: "أنا اتمنيت أمثل بسبب مسرحية شاهد ما شافش حاجة، وشُفت طفل وطفلة بيمثلوا مع عادل امام على المسرح وقتها انبهرت بهذا العالم".

وأشار: "عادل إمام ما يقدرش يقعد لوحده ولو غِبنا نلاقيه بيتصل بالتليفون ويقول لي لازم تيجي لي وتعالى نتعشا سوا ونشرب شاي، وكل سنة لازم يلمنا كلنا في الساحل الشمالي".