فردوس عبدالحميد عن «الضاحك الباكي» : «مش عارفة إيه سبب الهوجة دي؟!»

كشفت الفنانة فردوس عبدالحميد عن رأيها في الانتقادات الموجهة لمسلسل الضاحك الباكي، مؤكدة أنها لا تفهم سر هذه الهوجة الموجهة ضد المسلسل.

وأضافت، في تصريحات تليفزيونية: «عايزة أعرف إيه سر الهوسة اللي عاملينها على المسلسل ده؟، هما ما صدقوا بدأنا أول حلقة وعاملين يناقشوا حاجات، هو إحنا عاملنا أخطاء كبيرة أوي كده؟!».

وتابعت: «ده مش رد الفعل الحقيقي، ده على السوشيال ميديا بسبب التريند أو البعض ماشي بمنطق خالف تعرف، لكن الطبيعي لما بيتعرض أي عمل بنديله وقته في المشاهدة وبعدين نحكم عليه، فلازم الناس تدي فرصة للعمل وبعدين تحكم عليه».

وأضافت: «اللي انتقد المسلسل ممكن يكون متفرجش أًصلًا، مشوفتش ناقد نقد المسلسل بشكل حقيقي، لازم يشوف المسلسل أو نصفه على الأقل عشان يقول رأي كامل ويكون فكرة عن العمل».

وتابعت: «العمل ناجح جدًا مع الناس، ومسمع مع الناس العادية، وبتوصلني رسائل من الناس العادية وأنا في بيروت».

وردًا على الانتقادات الموجهة لدورها في المسلسل أجابت: «لما بنصور حلقة أو اتنين ممكن تعدي، لكن لما يكون فيه عدد حلقات كتيرة من حق الناس تعترض، وكمان لو جاب ممثلة تانية في البداية، وممثلة أخرى في الحلقات الأخرى ده بيكسر الإيهام عند المشاهد، وإحنا ما صدقنا أن يكون في عمل يقدم شخصية ثرية زي نجيب الريحاني، اللي أنا بسميه شارلي شابلن الشرق، وهذه الشخصية مخدتش حقها على مستوى التقييم، فأنا بشكر المؤلف محمد الغيطي أنه تجرأ وقدم هذا العمل، فنجيب الريحاني ملوش مثيل، في موقف يضحكك، وموقف آخر تبكي معاه».