الغيطي يعلق ساخرا على ياسمين عز ورضوى الشربيني ..محتوى جاهل ومستفز
سخر الإعلامي محمد الغيطي، من المذيعتين ياسمين عز ورضوى الشربيني، واصفا ما يقدماه بـ "المحتوى الجاهل والمستفز".
وقال الإعلامي محمد الغيطي، خلال تقديم برنامجه "تقدر" المذاع على قناة الشمس: " إحنا بنعمل غبار في الوسط الإعلامي والثقافي والفني وفي الميديا عموما.. زي المذيعة بتاعت إحدى القنوات الفضائية العربية اللي بتقولك لو جوز دخل الحمام إبقى شديله السيفون إيه القرف ده.. وبلاش ياخد الزبالة خديها أنت هو لو والدك هتقوليله خد الزبالة، هو جوزها مش والدها الجواز مشاركة".
وأضاف "الغيطي": " أنا لا مع مذيعة تبهدل الرجالة ولا مع واحدة تتعامل إنها جارية أوعبدة للراجل ربنا بيقول مودة ورحمة مشاركة.. والنضج العاطفي والنفسي ميوصلناش للحالتين المتطرفتين دول".
وتابع: " أنا كراجل أنا مش عاوز جارية وضد حقوق الإنسان.. فين المجلس القومي للمرأة من الرسالة الإعلامية دي.. وفي ستات متفوقات على الرجالة مينفعش أحولها لجارية .. يعني أنت لو هجيب أستاذة جامعة دكتورة وأستاذة وعالمة تروح تشد السيفون لجوزها أو تخلي خدها سجادة يدوس عليه بالجزمة.. ده جهل ونشاذ ومحتوى مستفز وهري ملوش لازمة وده عشان التريند ده وراه فراغ فكري".
