حسام داغر يروي مواقف إنسانية جمعته بالراحل هشام سليم.. تعرف عليها

نشر الفنان حسام داغر بوست عبر صفحته الرسمية على موقع التواصل الاجتماعي “فيس بوك”.

وشرح حسام داغر بداية تعارفه بالفنان الراحل هشام سليم والمواقف التى جمعتهما، وكتب: "رحل الجميل الطيب الجدع الحنين ابن الناس.. النضاف بيمشوا واحد ورا التاني.. لما شالولي مشاهد ليا في فيلم كلام في الحب وكان أول فيلم أشارك فيه وطلعت بره القاعة في العرض الخاص وبكيت، جريت ورايا تطبطب عليا وخصوصا إن في مشاهد إنت كنت فيها معايا وحضنتني وقلتلي اجمد لسه ياما هتشوف".

وأضاف داغر: "لما أنا اختلفت معاهم في مسلسل لحظات حرجة وكان المخرج الكبير ساعتها أول مرة يخرج ومكانش مقدر إني عندي مسرحية مبلغ بيها الإنتاج، وكان لازم أمشي قبل الساعة ٩، وخرجت من أوضتك يومها زعقت فيهم وفكرت المخرج يومها اللي اتريق على فكرة المشاركة في المسرح واعتبرها تضييع وقت، رغم إن والده الكاتب الكبير أساسا كان موظف في مسرح الدولة وشرحله قاعدة إن المسرح يلغي التصوير والتصوير يلغي البروفة، وقلتلي إنت لسه هنا اجري الحق مسرحيتك يا حس".

وتابع: "كنت دايماً ميهمكش وهيهمك مين وإنت المتربي على الأصول والأخلاق وجبر الخاطر.. ربنا يجعل تعبك ومقاومتك للمرض اللعين في ميزان حسناتك.. طول عمرك محارب حاربت واتحاربت كتير.. لكن المرادي للأسف خسرت المعركة وخسرنا كلنا هشام سليم.. ارتاح و نام ما هي إلا نومة بنرتاح فيها كلنا.. أو ممكن أعتبرها استراحة محارب.. مع السلامة يا برنس السينما والمسرح والتيلفزيون.. مع السلامة أستاذ هشام سليم".