طبيب شيرين عبد الوهاب يكشف مفاجأة عن علاجها من إدمان المخدرات

قال الدكتور نبيل عبد المقصود مدير مستشفى قصر العيني الفرنساوي الأسبق وطبيب الفنانة شيرين عبد الوهاب، إن شيرين قوة ناعمة لمصر يجب أن تستغل، موضحًا: "شيرين عبد الوهاب قابلتها مشاكل كتير لا داعى للخوض فيها وهذه المشاكل أثرت عليها وخلتها قاعدة في البيت مش عايزة تكلم حد ولا تقابل أو تتواصل مع أي حد وهذا انطبع عليها وعلى صحتها بالسلب".

ولفت "عبد المقصود" خلال تصريحات تليفزيونية: "شيرين كانت محتاجة رعاية وتحس بحد يسمعها ويوجهها للطريق الصح وحد يديها طاقة ايجابية ويساعدها تقف علي رجليها تاني وده اللى حصل من خلال، وشيرين مكنتش محتاجة لأستاذ سموم ولا استشاري امراض نفسية ولكن كانت محتاجة انسان، والإنسان ممكن يبقى ابوها أو اخوها أو أي حد يقدر يساعدها، وانا طبيب في المجال وانسان قدرت اساعدها".

وأكمل: "مش عايزين ندخل شيرين في منطقة أنها بتتعالج من الإدمان، ليه بنحاول نهدمها"، موضحا: "شيرين لا تعاني علي الإطلاق من ادمان المخدرات أو إدمان أي شيء".

وأضاف: "وقوف شيرين مجددًا علي المسرح وابهارها للجمهور بالطريقة اللي ظهرت بيها ووقوفي معها وتحسين حالتها النفسية والصحية ومساندتها في كل مجالي وفي كل حاجة اقدر اساعد فيها ده فرق معايا، وكانت في الأول بتقولي مش هاروح أغني وانا اللى اصريت انها تغني لتنتصر لنفسها واثبات وجودها وعملت حفلة رهيبة في تونس مع ناس سميعة وذواقة".

واختتم: "شيرين عبد الوهاب راجعة للغناء وبقوة، ومهرجان قرطاج الفني اللى شاركت فيه اعطاها قبلة الحياة مرة أخرى خاصة مع حفاوة الجمهور بها".