تفاصيل ضبط عامل تحرش بشقيقة هنا الزاهد داخل مول شهير بأكتوبر
في نجاح امني جديد، كشفت الأجهزة الأمنية بوزارة الداخلية، ملابسات ما تبلغ لقسم شرطة أول أكتوبر، بمديرية أمن الجيزة من مسؤولي الأمن الإداري بأحد المولات التجارية بدائرة القسم، بقيام أحد الأشخاص بالتحرش بإحدى الفتيات داخل المول.
وكشفت الأجهزة الأمنية أنه بالانتقال والفحص تم التقابل مع طالبة مقيمة بدائرة قسم شرطة الجيزة، والتي تضررت من عامل مقيم بدائرة قسم شرطة السلام بالقاهرة، واتهمته بالتحرش بها لفظيا أثناء تواجدها داخل المول، وبمواجهة المتهم اعترف بارتكاب الواقعة.
وقالت شيرين المنزلاوي والدة نور الزاهد، الشقيقة الصغرى للفنانة هنا زاهد والتي تعرضت ابنتها للتحرش داخل أحد المولات، إنه تم القبض على المتحرش، معبرة عن امتنانها بسرعة التدخل من قبل الشرطة واتخاذ موقف صارم تجاهه.
وأضافت المنزلاوي موجهة نصيحة للفتيات: محدش يخاف، حق أي بنت إنها تمشي بأمان وما تخافش وما حدش يبص لها؛ لأن في نظرة بتعريها، والمفروض أي بنت لها حق ترفض أي نظرة مش عاجباها، وتاخد حقها؛ علشان يتعلموا إن ما فيش حاجة زي دي تحصل ويسكتوا عليها.
وتابعت: مش هنستنى لما واحد يدبح واحدة زي نيرة أشرف، إحنا بنعلم ولادنا ما يسكتوش على الصغيرة؛ علشان ما يحصلش الحاجة الكبيرة.
ونشرت الفنانة فرح الزاهد، صورة للمتحرش عبر ستوري حسابها الخاص بموقع إنستجرام، وعلقت عليها: طيب دلوقتي الراجل ده متحرش واقف في مول مصر عمال يتحرش بالبنات وحاجة في منتهى قلة الأدب!.. مرحمش حتى أختي الصغيرة من المعاكسات والكلام وعمال يغمزلها وحاجة تخدش حياء أي بنت.
وأكملت: وهي واقفة عند البنك هي ووالدتي، فزعقوا فيه، يروح مبجح فيهم ويقل أدبه، ويقول: أنا معملتش حاجة، ومجتش جمبها، والناس حواليه عادي جدا، مفيش راجل واحد بس عايز يتكلم!، طلبنا النجدة، ويا رب يكون في استجابة سريعة؛ عشان نقضي على الأشكال دي.
