شريفة ماهر: ربنا ياخدلي حقي من أولادي ومش هروح جنازة ابني

تحدثت الفنانة شريفة ماهر، عن وفاة ابنها الأكبر، الذي توفي اليوم، عن عمر ناهز 70 عامًا، ودفن بمقابر الأسرة.

وقالت "ماهر"، خلال تصريحات تليفزيونية: مش هروح جنازة ابني، وربنا ياخدلي حقي منه، أنا محدش قالي خبر الوفاة ومكان العزاء وعرفت بالصدفة من حد بعيد عننا، وهو استغلني وكان واقف جنب ابني التاني عشان ياخدوا الورث دون وجه حق.

وأضافت: بنتي الكبيرة واخدة مني عمارة، وفلوس كتير من غير وجه حق، وأنا شوفت من أولادي حاجات أوحش وأبشع من قصص المسلسلات، يعني مثلا في مسلسل الطوفان قتلوا والدتهم، وأنا أولادي عملوا معايا أكتر من كدا.

وتابعت شريفة ماهر: أنا قبل ما أمي تموت كنت قاعدة تحت رجليها، وبخدمها وكانت بتدعيلي وتقولي ربنا يحبب فيكي خلقه، وربنا ما يحوجك لأولادك، وأنا بتكلم دلوقتي عشان لازم الناس تتعظ وتفوق ويعرفوا الدنيا فيها أيه.

جدير بالذكر، أثارت شريفة ماهر وأولادها الجدل مؤخرا على مواقع التواصل الاجتماعي، وذلك بسبب الخلافات التي بينهم، واستغلال أبنائها لها وأجبروها على التنازل عن أموالها واستغلوا ضعف نظرها، وبالتالي تم طردها من منزلها وأخذ جميع أموالها، وتعاطف الناس معها على مواقع التواصل الاجتماعي.