تفاصيل حرب هاني شاكر وساويرس.. ألفاظ جارحة وهجوم متبادل

شن الفنان هاني شاكر نقيب المهن الموسيقية هجومًا حادًا على رجل الأعمال نجيب ساويرس بعد هجوم الأخير على النقابة بسبب منع 19 من مطربي المهرجانات عن الغناء.

ورد "شاكر" خلال تصريحات تليفزيونية قائلًا: «نجيب بيقول إنه ما بيسمعش الأغاني اللي أنا بقدمها، وأنا بقوله ما يشرفنيش إنك تسمع الأغاني بتاعتي، اللي يسمع المهرجانات ما يشرفنيش إنهم يسمعوا أغانيا».

وأضاف نقيب الموسيقيين: «نجيب مش فاهم حاجة.. وما دام مش فاهم يبقى يسأل.. وهو بيقول إن مفيش حد بيسمعنى وأنا بقوله كنت تعالى شوف حفلتي في مهرجان الموسيقى العربية وانت تعرف كم ونوعية الجمهور اللي بيسمعني».

وتابع: «أنا ما علقتش على الفضايح اللي حصلت في مهرجان الجونة، هو ليه بيتكلم في اللي مالوش فيه، زي مانا مش عاجبه هو برضه مش عاجبني».

وسبق وأن علق رجل الأعمال نجيب ساويرس على منع 19 من مطربي المهرجانات عن الغناء، قائلًا: "إن قرار منع مطربي المهرجانات عن الغناء قرار معيب، وأنه لا أحد يستمع إلى هاني شاكر، ويجب على هاني يهتم بالظروف الصحية والاجتماعية للأعضاء، ولا أحد يستطيع منع أحد من الغناء، وأن ما فعله هاني شاكر هو نفسنه".

وبدأت الأزمة بين شاكر وساويرس بتغريدة من رجل الأعمال على حسابه في "تويتر"، قال فيها: "أول مرة أشوف نقيبًا للمغنيين فخورًا جدًا بمنع الغناء، الجمهور اللي يقرر يسمع مين وميسمعش مين مش النقيب، مش عاجبك ماتسمعهوش".