سونيا الحبال تكتب: يعني ايه ناس راقية

يعني ايه ناس راقيه ؟؟؟

الرقي عمره ما كان لبس بس وفلوس ونوع عربيّات ياما فيه بدل وفساتين براندات شايله نفوس مريضه .. الرقى الاعظم في تعاملك في اسلوبك في حوارك ..

الرقي الاكبر وانت بتحب وانت بتبعد .. الرقي وانت بتزعل وانت بتخاصم وانت بتصالح الرقي ملوش علاقه بالانتقام والتكبر والغل والسواد الناس الراقيه مبتعرفش غير اللي زيها ..صعب اوى تلاقي معاهم ناس دون رقيهم .. وكتير بنعرف الناس من الناس اللي معاهم ..دائما بيبقوا شبه بعض ..

الرقى مش محتاج تبرير ..المطلوب منك بس نشوف تعاملك حوارك كذبك صدقك والناس اللي بتعرفهم وبتحبهم ..وبعدين نقول لحضرتك انت فين في جدول الراقيين ..

لا الساعه اللي في ايدك وانت بتتكلم ولا الخاتم اللي بتشاوري بيه سيادتك هو مقياس رقيك .. الرقي ده ليه ابعاد تانيه ميفهمهاش اي حد ولا يعرف مقايسها اي حد .. عيشوا فقراء ..اغنياء..متخاصمين ..متصالحين ..حابين ..كارهين .. بس اوعوا تكونوا غير راقيين ..

الرقي بس هو علامة جودة حياتك ومشوارك