سونيا الحبال تكتب: حكاية الخمسه جنيه

كنت مره متضايقه اوى وعندي مشكله ومش عارفه احلها ازاي ..

وكالعاده تقوقعت وخدتها مشي ساعه ساعتين افكر في حل وانا ماشيه لاقيت واحده غلبانه بتقولي ربنا يروق بالك يا بنتي ..

بسرعه حطيت ايدي في شنطتي مكنش معايا اي فلوس في شنطتي غير خمسه جنيه ..ياااه نزلت من غير حتي ما اخد بالي ايه اللي في شنطتي ..

اديتلها الخمسه جنيه وانا مكسوفه ووشي في الارض ..

الست قامت بسرعه مصممه تبوس راسي وايدي ..فضلت تدعيلي تدعيلي وانا اقول في نفسي كل ده عشان خمسه جنيه ده انا محرجه من نفسي اووووى..

مشيت ونسيت مشكلتي وفضلت افكر في الخمسه جنيه ..هيا الست هتعمل بيهم ايه !!! ايه اللي مفرحها كده..!!!

وانا بفكر موبايلي رِن ..اتصال مش متوقع تماما ..اتصال حل المشكله الكبيره اوى اللي انا نازله افكر فيها ومش لاقيه ليها حل ..

المشكله اتحلت يااالله ..الدعوه استجابت ..

ايه ده!!!

لفيت ورجعت تاني عايزه ارجع بيتي ..حطيت موبايلي في جيبي ومشيت ..لاقيت ورق في جيبي ..طلعته ..لاقيت خمس ورقات فئه ٢٠٠ج

ايه ده الفلوس دي جت هنا ازاي ..مش بتاعتي والله العظيم ما بتاعتي ..انا مش بحط اي فلوس في جيبي مش عادتي ..

ودائما كان عندي مبدا الفلوس اللي الاقيها واحس انها مش بتاعتي اعرف ان ربنا باعتهالي لحد محتاجها ..احنا مش بنشوف ربنا يا جماعه ..لكن نقدر نتواصل مع ربنا برسايله الخفيه لينا ..دي قناعتي ..

رجعت نفس الطريق تاني ولاقيت نفس الست بتبصلي وتضحك ..ياربي كانها ملاك عارف كل حاجه ..اديتلها كل الفلوس اللي لاقيتها ..قعدت جنبها ..قولتلها انتي جميله اوى وانا بحبك اوى ..

قالتلي ربنا رضاكى يا بنتي ..جبر بخاطرك !!!!

وشك بيضحك غير لما شوفتك من شويه ..

قولتلها الحمد لله الحمد لله ..

قالتلي بصي ..وراحت مطلعه الخمسه جنيه من جيبها اللي انا اديتهالها في الاول ..قالتلي شوفي ..لاقيت مكتوب ع الخمسه جنيه بالقلم الجاف (مجبوره ان شاء الله ..وتحتها اسم ايه )

يااااه عشان كده الست فرحت وعيطت من الخمسه جنيه ..الست فهمت رساله ربنا ليها ..

الست كانت عارفه ان ربنا هيجبر بخاطرها بشكل او باخر عن طريقي او عن طريق غيرى..

من يومها وانا خدت قرار ..ان ورقه الخمسه جنيه دي مش بتاعتي خالص ..انا مجرد مرسال او اداه لتوصيلها ..

لو معايا الف خمسه جنيه دي مش بتاعتي ..

كل خمسه جنيه تيجى في شنطتي او محفظتي ..دي مش بتاعتي ..مهما طلعت زكاه او صدقات دي حاجه والخمسة جنيه دي حاجه تانيه خالص ..

رسايل ربنا ..دي حاجه تانيه ..

الجهل حقا اننا منفهمهاش ..

الغباء اننا نتجاهلها ونشتكى احوالنا ..

رسايل ربنا حوالينا كتير اوى بس اللي يفهم ..وجود الغلبان في طريقك انت بالذات رساله ..

وجود الجعان وانت بتاكل في طريقك انت رساله

صدفتك مع العجوز اللي عايز يعدي الشارع قدامك انت رساله

جارك الفقير إللي ساكن قدامك انت بالذات رساله

رسالتي دلوقتي ليك انت حاليا بحكايتي دي رساله ..

كل اللي في ضنك وتعب وضيق وهم وغم ناس متجاهله الرسااااله..



وايضا.. عماد فرغلي يكتب: خطوة بألف خطوة



وايضا..https://www.facebook.com/anahwa2019/