نهاد أبو القمصان تفتح النار على مسلسل «حالة خاصة»

تحدثت المحامية نهاد أبو القمصان عن رأيها في مسلسل «حالة خاصة» والذي تدور أحداثه حول شاب مصاب بالتوحد يعمل في مكتب محاماة تمتلكه غادة عادل.

مسلسل حالة خاصة

قالت "أبو القمصان" في فيديو على حسابها بموقع تيك توك "جميل أن يكون في مسلسل بيتكلم عن وجود شاب عنده حالة خاصة بس المكتب دة عايز يتشمع بكل المحاميين اللي فيه، يعني أولا ازاي نجيب صاحبة القضية ونقعدها مع كل المحاميين ومنهم المحاميين اللي تحت التمرين ونقولها قولي كل أسرارك قدام الكل ونقولها هما دول اللي هيحلولك القضية ده ضد مهنة المحاماة تمامًا مش في حاجة اسمها خصوصية ازاي اجيب موكل يتكلم عن أسراره قدام شباب لسه بيتعلموا ومتعينوش في المكتب وده انتهاك شديد لقيم واخلاق مهنة المحاماة".


وأضافت: "ثانيًا خلع ايه اللي بيعملوله تحقيق، 6 بيحققوا في قضية خلع ويصوروا جوز الست ويقولولها هاتي كشف طبي، الكلام ده ممكن يكون بيطبق في انجلترا اللي فيها اقتسام للثروة فكل واحد بيثبت أن مش هو سبب الطلاق لكن الخلع عندنا الست بتتنازل عن أي حاجة ومش بنقول أسباب أصلًا أما التحقيقات دي في الطلاق للضرر".

وتابعت: "فالمسلسل فيه مشكلة من ناحية اخلاقيات المهنة ومن ناحية الموضوعات المطروحة فهاتوا محامي يراجع المسلسل".

واسترسلت قائلة: "كمان الجناية اللي المتهم ممكن يأخذ فيها اعدام ولسه بنتناقش فيها وحد يديها برشامة فيها الحل قبل ما تترافع وتقولولي دي أكبر محامية في مصر وهي الصبح بتقول للمحاميين انتوا أكبر عقول وأكبر محاميين ومش عارفين توصلوا لحل".

وأضافت: "وصاحبة المكتب قعدة مع ال6 متدربين اللي لسه بتختبرهم مش حتى دول تحت التمرين والست أفراد معاهم قضية واحدة، ولا المحامي المتحرش هل في محامي ممكن يتجرأ على استاذته ويتكلم معاها بالطريقة دي".

وتابعت: "حرام تدمروا ثقافة المجتمع القانونية دة احنا بنقعد سنين نبني الوعي القانوني وكمان موكلة تيجي لمحامية تقولها أنا هربانة من البوليس فتكلم المباحث تسلمها هي فين نقابة المحاميين من الكلام ده".

واختتمت حديثها قائلة: "أنا اتفرجت على 4 حلقات وقلبي مش جايبني ده مفيش منظومة اخلاق ولا قواعد مهنية ولا قانون".

مسلسل "حالة خاصة" من أعمال Watch it الأصلية، بطولة طه دسوقى، غادة عادل، أحمد طارق، هاجر السرّاج، حسن أبو الروس، وئام مجدى، أحمد الأزعر، على السباعى، لينا إيهاب، الطفل آدم وهدان، أدهم النحاس ، تأليف مهاب طارق وإخراج عبد العزيز النجار وإنتاج طارق الجنايني.