انتهى الأمر.. عمرو مصطفى يوجه رسالة لرامي صبري ويكشف موقفه بعد حذف الأغنية

وجه الفنان عمرو مصطفى، رسالة للمطرب رامي صبري، قائلًا: "انا لو غلطت فيك يا رامي كنت هطلع اعتذر ومش هاخجل ومش هيبقى عندي أنا ولا غرور ومش هتكسف من أي حد وهبقى فخور بنفسي إنما مش هنام بالليل وأنا مضايق حد".

وتابع عمرو مصطفى قائلًا: "وقصة المغرور دي تسببت لي في أزمات بحياتي والجمهور اذاني لما اتهمني بالغرور فابتديت انزل لحد لما بقى يتطاولوا عليا من قبل بعض الفنانين وانا مش هقبل بالتطاول، ولو انت بتقارن بالميزان هخلي الجمهور يقول أنا نجاح 5 شهور من بداياتي لما نزلت كملحن كان كوبري اكتوبر بتاعي بالتاريخ بتاعكم كله وده مش غرور دي حقيقة وارقام".

وأضاف عمرو مصطفى خلال تصريحات إذاعية: "يا رامي صبري انتم استباحتم الحاني، ازاي عايزني متكلمش، وانا طلعت اتكلمت اني اتسرقت محدش يكررها تاني لا قريب ولا غريب، واما صعد ضدي في تصريحات الاعلامية كان لازم اتحرك ضده بعد سرقة لحني في اغنية يمكن خير".

وتابع: "رامي صبري طلع قال انا ممكن اقعده في البيت، مين اللي يقعد مين في البيت؟ ازاي جت في خياله؟ في الخيال جت ازاي للحظة فكر يقول كد؟ قال انا خريج حقوق وهو متخرج من معهد الموسيقى العربية طيب هو بليغ حمدي خريج ايه كان خريج حقوق زي، بليغ حمدي حقوق".

وأكمل: "امبارح بالليل بعد لما حذفتله الأغنية من علي يوتيوب قسما بالله كنت متضايق ولحد دلوقتي متضايق، وعايز اقوله اهدأ القصة مش انت هما بيشغلوني بيك، القصة هما 3 في الوسط الموسيقي وبيسخنوه وبيستغلوه، ومعنديش مشكلة في فتح صفحة جديدة مع رامي صبري".

واستطرد: "عايز اقولك يا رامي صبري اقسم بالله نجاحك من نجاحي ونجاح محمد حماقي من نجاحي ونجاح أي فنان من نجاحي، أحمد سعد معملتوش ولا اغنية بس اكتر واحد دافعت عنه، شيرين عبد الوهاب طلعت قالت ياريت يا عمرو مصطفى متغنيش تاني صوتك وحش وانا أول واحد كنت واقف معاها في ازمتها بمنشور انا الوحيد في مصر، وانت يا رامي لو لا قدر الله حصل معاك حاجة هاكون أول واحد واقف معاك وبقوله متخليش الناس تفرح فينا وانا قلت يا جماعة انا مبهزرش وأي حد هيصعد قصادي مش بهزر".

وأكد: "قررت اني مش هصعد ضد رامي صبري ولا هقيم دعوى قضائية ضده بسرقة لحني والأغنية اللى حذفتهاله هرجعهاله تاني، وانا بحب البني اَدم ده علي المستوي شخصي بس مينفعش حد يبوظ هيبتي في المزيكا".