22 تصريحا جريئا لـ سامح حسين..”كنا بناكل بواقي الأكل ورفضت العمل مع الزعيم”
أعلن الفنان سامح حسين، عن تفاصيل عديدة في حياته الشخصية والظروف الصعبة التي مر بها منذ انفصال والديه، ووفاة شقيقه ووالدته بالسرطان، وعلاقته مع أشقاءه من والده ومهن عمل بها، وغيرها من الأمور الأخرى.
نستعرض لكم أبرز 22 تصريحا جريئا لـ سامح حسين في السطور التالية:
- عشنا فترة صعبة جدا لكن كان عندنا عزة نفس.
- والدتي كانت تروح لأقاربنا وتقول إننا بنربي فراخ في المنور، ويدوها بقايا أكل للفراخ، لكن الحقيقة إحنا كنا الفراخ اللي بناكل البواقي.
- بدأت أشتغل من صغري.
- أنا عندي ألم في فقرات الظهر السفلية من أيام دراستي في الجامعة، لإني كنت محتاج فلوس جنب الدراسة.
- اشتغلت فواعلي أشيل طوب ورمل وأطلع عمارات.
- والدتي قعدت في المستشفيات 6 شهور، وأنا ساعتها كنت قليل الحيلة، ومكانش معايا فلوس أجيب لها كيس دم، وإما أتبرع أو أطلب من أصحابي، وفي آخر أيامها عرفت من الدكتور ان وفاتها هتكون خلال أسبوعين.
- وفاة والدتي هزتني ووجعت قلبي، وتوفيت وهي عمرها 49 سنة بعد ما جالها السرطان، وفضلت 7 شهور بعد وفاتها أتمنى إني أموت.
- بعد وفاة والدتي توفي شقيقي أحمد وعمره 19 سنة تقريبا.
- إخواتي أنا اللي مربيهم ومعلمهم، وده بسبب الانفصال بين الوالد والوالدة.
- واخد على خاطري من والدي، عشان كده دايما أقول لمن يفكر في الزواج لو مش قادر على مسؤولية الزوجة والأولاد بلاش تتجوز.
- إخواتي أنا بعتبرهم أولادي، ووالدي ووالدتى كانوا منفصلين.
- كافحت مع والدتي علشان نربي اخواتي .
- أنا بحترم جدا كل اللي بيشتغل وبيصرف على أهله.
- أنا لا أخجل من أي شئ بالعكس كان ربنا بيطبطب عليا دايما.
- أنا على علاقة جيدة جدا مع اخواتي من والدي ووالدتهم.
- كانت زوجة والدي ووالدتي أصحاب جدا وكنا ساكنين في بيت واحد لدرجة إن زوجة والدي ما زالت لابسة أسود بعد وفاة والدتي من حبها لها وأنا بعتبرها زي أمي وهي دي الروح الجميلة اللي اتربينا عليها في حي شبرا.
- معايا ليسانس حقوق بناء على رغبة العائلة، لأن معظم العائلة محامين ووكلاء نيابة.
- التحقت بكلية الآداب قسم مسرح علشان أمارس هوايتي في التمثيل.
- اشتريت سيناريو فيلم اسمه "سندوتش عيال" وهو عمل اجتماعي جدًا والمنتج أحمد السبكي متحمس ليه جدًا، وبيتحدث عن الأطفال وتأثير مشاكل الأب والأم عليهم.
- كنت شغال في النقاشة وكنا بنعمل عمارة من الخارج وكنت شغال في الدور الـ 17 متعلق على ثقالة، وبعدين اتحركت من مكانها كنت هموت.
- حصلي حوادث كتير، على طول بتكهرب لدرجة أن شعري أبيض من أيام الثانوية العامة.
- أنا من عشاق الزعيم عادل إمام، وأكيد الشغل معاه إضافة لأي فنان، ولكن لما اتعرض عليا دور بمسلسل فلانتينو، الدور مجذبنيش كدور مهم أو مؤثر في الأحداث ورفضته، والمشكلة مكنتش في مساحة الدور اللي اتعرض عليا في المسلسل، لكن لأنه الزعيم لازم تحس إنك هتبقى مؤثر في العمل وأنا محستش بـ ده، والفنان حمدي المرغني قدم الدور بشكل حلو جدا.
