ماس كهربائى ولع فى حذائها..والدة طفلة تروي تفاصيل نجاتها من الموت بملاهي شهيرة

أثارت والدة طفلة الجدل على السوشيال ميديا بسرد حكايتها مع ابنتها في ملاهي شهيرة أدت إلى حرق حذائها بسبب ماس كهربائي.

ونشرت السيدة تدعى أ.ع، على إحدى جروبات الأمهات قائلة : ولادي دخلوا لعبه العربيات الكهربائية وشويه كده كل شوية نلاقي عربية فيها مشكلة يعني عربية بطيئة عربية مش شغالة..فجأة لقينا ماس كهربائي والعربية اللي فيها بنتي ولعت النار فيها وخرجت من تحت رجليها ومسكت في الشوز بتاعها البنت طبعا قعدت تصرخ وتدوس فرامل العربية مش راضية تقف والنار ماسكه بالشوز بعد كده افتكرت أن فيه مفتاح بيقفل العربية".

واستكملت :"وقفت العربية والحمدلله الشوز هو اللي أتحرق بس..بعدها لقينا لوحة الكهرباء بدأت تطلع شرار كل ده وولادي جوه أنا قولت خلاص المكان هينفجر بأولادي..الولاد اللي هناك جابوا طفاية الحريق وطفوها بسرعة.بنتي طبعا الدخان كله بتاع العربية جه في صدرها..تخيلوا لو البنت موقفتش العربية كان إيه اللي حصل".

وتابعت:"أنا في رحمة كبيرة من الرحمن الرحيم..ربنا حماها ورعاها حرفيا أنا لو قعدت عمري كله اشكر ربنا أنه نجا بنتي ومخلنيش أشوف فيها حاجه وحشه مش هيكفي..ويارب يارب يارب محدش يشوف اللي أنا شوفته في اليوم ده أنا كنت هفقد النطق وهما جوه من كتر الخوف والرعب"

وأضافت:"بنتي خايفه من كل الألعاب اللي في الدنيا تخيلوا مكان بالغباء والتسيب ده بدل ما يحافظ علي سلامه ولادنا ويوفر لهم الأمن أداهم رعب وخوف وقلق طول عمرهم".