«انهيار وبكاء».. منى عراقي: مش هتجوز فى السر تاني ونفسيتى اتدمرت.. فيديو
انهارت الإعلامية منى عراقي، باكية أثناء حديثها عن زواجها الذي أعلنت عنه في وقت سابق، إذ أكدت إنها لم تتزوج من الدكتور أيمن رشوان، كما انتشر خلال الساعات الماضية.
وقالت "عراقي" في بث مباشر لها عبر حسابها الشخصي بموقع "فيس بوك": إيه القرف اللي أنا فيه ده؟ كل دا بيحصلي ليه؟ ايه المهم في قصة جوازي وارتباطي أنا بقالي أكتر من يومين مش بنام ونفسيتي اتدمرت عشان قررت أعلن عن حياتي الشخصية، وأنا مش عايزة أتجوز في السر تاني خلاص ولادي كبروا أخبي ليه؟ وقالوا لي بلاش ترتبطي في السر، دلوقتي مفيش داعي.
وأضافت: ولما حد كان بيسألني كنت بقوله هتجوز قريب، والسؤال اللي دمر نفسيتي بقاله يومين هو سؤال الناس عن هوية العريس، إنت مالك؟ أنا حرة أقول وقت ما أنا عايزة وحرة أقول مين، وإنت بردو أصروا يعرفوا وقولت لهم هعلن في الوقت المناسب عشان حياتي وحياته متبوظش.
وتابعت: وجه فرح وحضرت وروحت أسلم على أيمن رشوان والناس قالوا آه يبقى هو أيمن، لقيت الخبر في الجرنال وتفاجئت زيي زيه، وأنا مكنتش متخيلة الموضوع يبقى بالأهمية دي، وبراحتكم أهروا أنا متعودة مردش على الحاجات دي.
واستكملت: اللي عرفني الخبر صديقي، قالي إلحقي علشان شافوكم بترقصوا في الفرح إنتي وإيمن قالوا إنكم متجوزين، طلعت في فيديو وقُلت مش أيمن وهو صاحبي وأخويا، وهو طلع نفى، تليفوني مش بيبطل رن وبيسألوا اتجوزت مين، إنت مالك؟، خلصت القصة، يعني إيه جواز منى عراقي اللي بقالها سنة بعيدة عن الشاشة يبقى التريند الأول عربيًا.
وأعربت عن استيائها من تصدرها تريند مواقع التواصل الاجتماعي قائلة: أنا ياما عملت شغل ومحدش عبرني، وياما عملت نجاحات ولا حد سأل فيا، وياما عديت أزمات صحية ونفسية ومعنوية ومحدش قالي إنتي فين، ليه خبر جوازي يقلب الدنيا.
وانهارت منى عراقي، باكية في نهاية حديثها، قائلة: أنا مش عايزة أقول هو مين، وكل اللي يهمني أقوله إنه مش أيمن رشوان، وقُلت ده من ساعتها، إيه القصة؟ مين يجي يخلصني من التريند بتاعي ده؟ ولادي تأذوا وهو حياته اتلغبطت والله أعلم بحاله، والقصة تافهة.
