سونيا الحبال تكتب: يعني ايه أم تأخذ ثمن رضاعة طفلها ؟
لكل الفتاوى السافرة في حق المرأة أقول لكم، "مفيش حاجه في الدين بتقول ان أم تأخد حق رضاعتها لطفلها من جوزها ..احنا مش بقر عاملين مشروع يا أفاضل ..دي أمومة ورحمه وحياه ..ده الحيوانات بتموت علي ولادها هتمشروعوا امومتنا يا ناس إزاي طيب".
لكل الهرتلة بتاعة الزوجة مش مسئولة ترعي بيتها وجوزها ..امال قاعدة في مملكتها تعمل ايه معلش ..واشمعنا في بيت ابوها كانت بتساعد أمها في كل حاجه بتلزموا الزوج بشغاله مساعده للزوجه ومش بتلزموا الأب ليه طيب يجيب لبنته مساعده برضه هو خراب بيت وخلاص.
إحنا أبناء أمهات عرفت تعلمنا يعني ايه بيت وراجل ومسئوليه وكتف وكتف وقت الازمات.
انا منساش مره بابا حب يريح ماما جاب غدا من بره وهو جاي قالها بريحك يا (سهرة ) كما كان يلقبها دوما ..لاقيتها مش مبسوطة بقولها مالك يا ماما ..قالتلي هو فيه احلي من قعدتنا مع بعض في اكله انا عملتها وتقولولي تسلم ايديكي دلوقتي كلنا هنقول تسلم ايدين اللي طبخ واللي جاب اناااا فين.
هو انتي لمًا مكنش ليكي دور في خدمة ولادك وجوزك والاستمتاع برعايتهم وسماع الاستحسان والتقدير هتبقي ايه سيرتك معاهم دلوقتي وبعد كده، احنا عايشين بسيرة أهالينا في التعب والتضحيات يا جماعةز
اللي هيعلقوا ويقولوا وانتي يا هانم بتعملي كده أنا بعمل أكتر من كده الحمد لله ..أنا لازم أكون كل حاجه في بيتي ..
بلاش بوستات اعملوا ومتعملوش دي والنبي خربتوا بيوتهم.
