بكلمات مؤثرة.. ابنة سامي العدل ترثى والدها في العيد
رثت رشا سامي العدل، والدها الفنان الراحل سامي العدل، قبل ذكرى وفاته بيوم، مشيرة إلى أنها تفتقر إلى نصائحه ودعمه لها في حياتها.
كتبت “العدل” عبر حسابها الرسمي بموقع التواصل الاجتماعي “فيس بوك”: “العيد مش عيد من غيرك ملوش أي طعم بجد زاد عليا السنة دي أن ذكري وفاتك بكرة كمان وأنا في دهب من غير أهل ولا أصحاب يهونوا عليا، مشيت وسيبتني بدري قوي كان لسة فيه كتير عايزة أعيشه معاك كان نفسي تبقى جمبي وأخد رأيك ونصيحتك في قراراتي مؤخرا”.
أضافت: “مش عارفة أنا صح أو غلط مش عارفة أتعامل و تايهة كده من بعدك لا عارفة أقف على رجلي وأواجه كل الصعوبات ولا عارفة أدي الدنيا ظهري وأكبر دماغي بقيت بخاف أخاطر بأي قرار إذا كان في حياتي الشخصية أو الأسرية أو العملية.. عارف ليه؟ علشان لما كنت عايش كان عندي الجرأة أخاطر وعارفة أنك موجود توجهني لو غلطت وتقف جمبي وتدعمني لو أنا صح”.
أردفت: “وحشتني قوي يا سمسم ووحشني لمتنا على سريرك نتكلم ونرغي ونبعت نجيب أكل ونتفرج على فيلم أو نتناقش في كتاب أنت قريته أو مسلسل بتحضر له، وحشني حاجات كتير قوي معاك ملهاش أول من آخر لدرجة أني متغاظة منك إزاي تمشي كده وتسيبني من غير أب وسند في الدنيا الصعبة دي.. هو مش أنا دلوعتك وأول فرحتك يا حج سامي ولا إيه، طلعت قاسي قوي رغم أنك كنت أطيب قلب الله يرحمك ويحسن إليك”.
