د. حياة عبدون تكتب: من الحياة.. بياع الجرائد و نعمة الستر

يحكي الدكتور " مصطفي محمود"
انه كان يمر يوميا علي تاجر جرائد بجانب حديقة الحيونات بالجيزة
اثناء توصيل زوجته للعمل ، فكان يقف معه عند شراؤه للجرائد ليتعلم منه اسلوب الكتابة لانه كان رجلا مثقفا ..لكن الدكتور مصطفي محمود كتب يقول " لقد تعلمت منه درس أهم من اسلوب الكتابة .تعلمت منه درسا للعمر ، درسا للحياة ." ففي كل مرة كنت اساله : " ازيك انهاردة يرد " في نعمة الستر".
فاندهشت من الإجابة وسألته : " ليه الستر تحديدا ؟" .
فرد قائلا " لأني مستور من كله " ..
فرديت عليه :" ستر ايه يا حج ده انت البلوڤر بتاعك فيه رقعتين مختلفين اللون" .. فلما أحس بغبائي فبادر بالشرح " يا دكتور مصطفي الستر أنواع..
لما تكون مريض لكن قادر علي المشي علي رجلك فهذا هو الستر من مذلة المرض.!‏ لما جيبك يكون فيه جنيه يكفيك تنام متعشي حتي لو عيش حاف هذا ستر من مذلة الجوع .!
لما تكون تملك ملابس تحميك من البرد حتى لو مرقعة هذا ستر من مذلة البرد.!
لما تكون قادر تضحك وأنت حزين لأي سبب هذا ستر من مذلة الكسرة.!
‏لما تكون قادر تقرأ الجريدة اللي في ايدك هذا ستر من مذلة الجهل.!
لما تقدر تتصل فى أى وقت بأهلك تطمنهم عليك وتطمن عليهم هذا ستر من مذلة الوحدة.!
‏لما تكون عندك أي وظيفة حتي لو بياع جرايد زى حالاتي و لا تمد ايدك لحد هذا ستر من مذلة السؤال.!
لما يكون ابنك ربنا مبارك في صحته وتعليمه وبيته هذا ستر من مذلة القهر.
لما يكون عندك زوجة بنت حلال وشايلة الهم معاك هذا ستر من مذلة كسرة الراجل قدام مراته.!
الستر يا ابنى ليس ستر الفلوس الستر هو ستر النفوس.. تذكر دائما إنك تملك نعم يتمناها ملايين‏ البشر هي نعمة الستر." .
فعلا...لك حق يا دكتور مصطفي محمود ان تقول انه علمك درس الحياة .." ..
يا ليتنا نتعلم جميعا هذا الدرس .فهذا الدرس سييسر حياتك ..سيجعلها أجمل و اكثر رضا و قناعة و يسر و ستر ...
اللهم ...ادم علينا جميعا سترك في الدنيا و في الاخرة...اللهم اجعلنا ممن لا نفرح بفضيحة الاخرين بل نسترهم فناخذ اجر الستر و تسترنا يوم القيامة بسترك الكريم يوم العرض عليك ." قال الرسول صلى الله عليه وسلم لا يستر عبد عبدا في الدنيا الا ستره الله يوم القيامة " ..