شريفة ماهر تفتح النار على ابنها: أنت مزور وهسجنك يا حرامى

انفعلت الفنانة شريفة ماهر، على الهواء، بعد إجراء ابنها شريف شوقي، مداخلة فى أحد البرامج التليفزيونية خلال استضافة الفنانة القديرة ينكر فيها صحة تصريحات والدته بأنه ضربها وشتمها، واستولى على أملاكها.

وهاجمت الفنانة شريفة ماهر نجلَها شريف، خلال تصريحات تليفزيونية، قائلة: "الله لا يكسبك يا بعيد.. أنت كداب وحرامي، وربنا ينتقم منك"، ليرد نجلها: "شكرًا".

وأقسمت "شريفة" على الهواء بأنها لم توقِّع لابنها شريف على أي عقود خاصة ببيع ممتلكاتها، معقبة: "خلَّاني أمضي سرقة، وعاملة محاضر ضده من 2009، ده سلط بواب عمارتي عليا، وقال عني إني مريضة بالزهايمر ومتجبلهاش حاجة".

ليرد نجلها شريف شوقي: "أنا عارف إن الجنة تحت أقدام الأمهات، ولا يمكن في حياتي أشتم أمي أو أمد إيدي عليها، إيدي تتقطع قبل لما أمد إيدي عليها"، وتابع: "اشتريت الشقق الخاصة بأمي منذ 2007، وفي حيازتي والمرافق كلها باسمي، ومعايا عقود صحة وتوقيع، والمهندس اللي كان باني معاها العمارة موقع شاهد على العقود، وبعطيها فلوس تعيش منها، وأختي ناهد أعطتها مليون جنيه سمسرة من الفيلا اللي باعتها".

لتعقب الفنانة شريفة ماهر: "عامل لي صحة توقيع فين دي مزوة.. دا أنا هسجنك، أنا بايعة لبنتي نيفين العمارة من 2007، وكتاب ربنا مبعتش ليك.. أنت كداب وربنا هينتقم منك، لو هعدم عينيا"، مؤكدةً: "فلستوني ومبقتش لاقية أكل، وحسبي الله ونعم الوكيل في ابني شريف".

واستكملت: "لدي 4 أبناء شريف وطارق وناهد ونيفين، وقمت بتوزيع جزء كبير من ميراثي عليهم جميعًا، ولكنهم يعاملوني بقسوة وغلطة لم تعهدها أم".

وأكدت أن نجليها شريف وطارق وجَّها إليها السباب، ووصل الأمر إلى الضرب، موضحة: "شريف وطارق شتموني، والكبير شريف دفعني وكسر لي دراعي من 4 سنين، ولادي خدوا اللي حيلتي".

وأكملت: "بنتي ناهد زي إخواتها مش حنينة وقلبها جامد عليا ومبتسألش عليا، وشريف طول عمره بيحب الفلوس أكتر من أبوه وأمه، وبيعبد القرش ومعندوش حنية ناحيتي".

وعن إمكانية تقديم شكوى ضد ابنها شريف، علقت: "بشتيكه لربنا اللي هيجيبلي حقي منه، ووالده قبل ما يموت قال لي لازم أكتب لك كل حاجة علشان شريف هياخد كل حاجة، وفعلًا ده اللي حصل".