”بيكا“ يهاجم عمر كمال: مش بيطمر فيك حاجة ولو كنت ناسي أفكرك

في مفاجاة لجمهوره شن مؤدي المهرجانات حمو بيكا، هجومًا حادًا على زميله عمر كمال، وذلك بعد شهادته ضده، في تصريحات تليفزيونية، بأنه لا يُجيد الغناء.

وقال "بيكا"، خلال مقطع فيديو، نشره عبر صفحته على موقع التواصل الاجتماعي «فيس بوك»: «أنت بتقول إنك بتجيب مشاهدات 70 أو 80 مليون مشاهدة.. نسيت لما كنت بتعمل أغنية مش بتجيب 10 آلاف مشاهدة أصلًا.. أنت طالع تقول عليّا إني مش بعرف أغني!!».

وأضاف: «خلاص سيبت لك الغناء.. نفسي الناس تشوفك وأنت واقف قدام المايك بتسجل أغنية، توبة إني أغني مع شخصية زيك.. ولا أعمل معاك حاجة تاني.. طالما بتقول عليا مبعرفش أغني.. أومال أنت جيت لي ليه في الأول خالص.. واستقبلتك وضايفتك وأول تراك عملته معاك نجح.. وكنت كل ما تقعد معايا تقولي أنت يافطة المهرجان.. أنت كنت بتشتغلني مثلًا!!.. طالع دلوقتي قدام الناس تقول حمو مش بيعرف يغني!!».

وأشار إلى خلاف عمر كمال مع سمية الخشاب، بعد أغنيتهما الأخيرة «ادلعي»، قائلًا: «طلعت خبط في الفنانة سمية الخشاب برضه، أنت مش بيطمر فيك أي شيء.. رغم إنك مفروض تقول الحمد لله إن النجمة نزلت لك وكتر خيرها.. ولو الأغنية جابت 100 الف، كويس مش وحش.. الأغنية مش بالملايين والأرقام، أهم حاجة تشتغل في الشارع».